உயர் மின் கோபுரத்திற்கு முறையாக பணம் தரவில்லை என கூறி வி.ஏ.ஓ அலுவலகத்திற்கு பூட்டு போட வந்த விவசாயிகள் 5 பேரை போலீசார் கைது செய்தனர்.

கிருஷ்ணகிரி மாவட்டம், போச்சம்பள்ளி தாலுகா பர்கூர் ஒன்றியத்திற்கு உட்பட்ட வெப்பலம்பட்டி ஊராட்சியில் 800 கே.வி.ஏ உயர் மின் கோபுரம் அமைக்கும் பணியின் போது முறைப்படி கணக்கெடுப்பு நடத்தாமல் வெட்டப்பட்ட மரங்களுக்கு உரிய நிவாரணம் வழங்காமல் இழுத்தடிப்பு செய்ததாக கூறப்படுகிறது.

இதையடுத்து, வி.ஏ.ஓ அலுவலகம் முதல் முதல்வர் அலுவலகம் வரை புகார் கொடுத்தும் பாதிக்கப்பட்ட விவசாயிகளுக்கு உரிய நிவாரண தொகை வழங்கப்படவில்லை. இதை கண்டித்து கடந்த 2 தினங்களுக்கு முன்பு வெப்பலம்பட்டி முழுவதும் வி.ஏ.ஓ அலுவகத்திற்கு பூட்டு போடும் போராட்டம் நடைபெறும் என்று போஸ்டர்கள் ஒட்டப்பட்டிருந்தது. இதையெட்டி நேற்று கிருஷ்ணகிரி மாவட்ட பூசாரிகள் பாதுகாப்பு பேரவை மாநில அமைப்பு செயலாளர் கே.மணி தலைமையில் மாதேஸ்வரன், பழனி, ராஜா, மற்றும் அருணாசலம் ஆகிய 5 பேர் வெப்பாலம்பட்டியில் உள்ள வி.ஏ.ஓ அலுவலத்திற்கு பூட்டு போட வந்தனர். அவர்களை போச்சம்பள்ளி போலீசார் தடுத்தி நிறுத்தி சமாதானம் பேசினார்கள்.

சமாதானத்தை விவசாயிகள் ஏறக்காமல் மீண்டும் வி.ஏ.ஓ அலுவலகத்தை பூட்டு போட முயற்சிக்கும் போது போலீசார் அவர்களை கைது செய்து காவல் நிலையத்திற்கு அழைத்துச் சென்றனர். அங்கு அவர்களிடம் போலீசார் விசாரணை நடத்தி வருகின்றனர்.

ஓசூர் அருகே மது அருந்தும் போது ஏற்பட்ட தகராறில் ஒருவர் படுகொலை செய்யப்பட்டார்.

கிருஷ்ணகிரி மாவட்டம், ஓசூர் அருகே அச்செட்டிப்பள்ளியை சேர்ந்த பிரேம்நாத், மகேந்திரன், பாபு ஆகியோர் நேற்றிரவு மது அருந்தி உள்ளனர். அப்போது ஏற்பட்ட தகராறில் பாபுவை மற்ற இருவரும் பீர்பாட்டில், கல்லால் தாக்கியுள்ளனர். இதில் பலத்த காயமடைந்த பாபு உயிரிழந்தார்.

தகவலறிந்து வந்த மத்திகிரி போலீசார் பாபுவின் சடலத்தை மீட்டு உடற்கூறு ஆய்வுக்காக ஓசூர் அரசு மருத்துவமனைக்கு அனுப்பி வைத்தனர். இந்தக் கொலை சம்பவத்துக்கு காரணமான ஒருவரை கைது செய்துள்ள மத்திகிரி போலீசார் தலைமறைவான மற்றொருவரை தேடி வருகின்றனர்.

அகரம் ஊராட்சி மன்ற செயலாளரை இடமாற்றம் செய்ய எதிர்ப்பு தெரிவித்து 100க்கும் மேற்பட்ட பெண்கள் ஆர்ப்பாட்டத்தில் ஈடுபட்டனர். இதையடுத்து, ஊராட்சி மன்ற செயலாளர் மீண்டும் பணியில் அமர்த்தப்பட்டார்.

கிருஷ்ணகிரி மாவட்டம், போச்சம்பள்ளி தாலுகா காவேரிப்பட்டினம் ஒன்றியத்திற்குட்பட்ட அகரம் ஊராட்சி மன்ற செயலாளராக மெய்யப்பன் என்பவர் பணியாற்றி வருகிறார். கடந்த 3 மாதமாக உடல்நிலை சரியில்லாத காரணத்தால் ஊராட்சி செயலாளர் மெய்யப்பன் விடுப்பில் இருந்தார். இந்த நிலையில், இரண்டு மாதங்களுக்கு முன்பு மீண்டும் பணியில் சேர பி.டி.ஓ-விடம் பணி ஆணை வாங்கி வந்துள்ளார்.

ஆனால், ஊராட்சி மன்ற தலைவர் அறிவொளி ராமமூர்த்தி, ஊராட்சி செயலாளர் மெய்யப்பனை பணியில் சேரவிடாமல் தடுத்து வந்துள்ளார். இந்த நிலையில், ஊராட்சி செயலாளரை மாற்றும் எண்ணத்துடன் ஊராட்சி மன்ற தலைவர் இருப்பதாக கூறி அப்பகுதி பெண்கள் மற்றும் 100 நாள் வேலை திட்டத்தில் வேலை செய்யும் பெண்கள் நேற்று மாலை அகரம் காளியம்மன் கோயிலின் முன்பு 100 க்கும் மேற்பட்டோர், ஊராட்சி செயலாளரை மாற்றக் கூடாது என கோஷமிட்டனர்.

தகவல் அறிந்த காவேரிப்பட்டினம் பி.டி.ஓ அசோக்குமார் சம்பவ இடத்திற்கு வந்து பெண்களிடம் பேச்சுவார்த்தை நடத்தினார். அப்போது, ஊராட்சி செயலாளர் மெய்யப்பனை மீண்டும் பணியில் நியமிப்பதாக உறுதியளித்தார். இதையடுத்து, பெண்கள் கலைந்து சென்றனர்.