Today is Tuesday 2022 Sep 27
சினிமா
வெளியாகியிருக்கும் தரமான ‘வலிமை’ அப்டேட்! ரிலீஸ் தேதியை அறிவித்தது படக்குழு!

நடிகர் அஜித் குமார் நடித்துள்ள ‘வலிமை’ திரைப்படத்தின் வெளியீட்டுத் தேதியை அதிகாரப்பூர்வமாக அறிவித்துள்ளது படக்குழு.

ஹெச். வினோத் இயக்கத்தில், நடிகர் அஜித் குமார் நடிப்பில் உருவாகியிருக்கும் திரைப்படம் ‘வலிமை’. இதில் ஹீமா குரைஷி மற்றும் கார்த்திகேயா ஆகியோர் முக்கிய கதாபாத்திரங்களில் நடித்துள்ளனர். போனி கபூர் தயாரித்துள்ள இப்படத்திற்கு யுவன் ஷங்கர் ராஜா இசையமைத்துள்ளார்.

கிட்டத்தட்ட இரண்டு வருடங்களுக்கும் மேலாக உருவாக்கத்தில் இருந்த இத்திரைப்படத்தின் அப்டேட்டுக்காக தீச்சட்டி தூக்காத குறையாக காத்திருந்த ரசிகர்கள் பலர்.

எங்கும், எவரிடம் அதிகம் முணுமுணுக்கப்பட்ட சொல் ‘வலிமை அப்டேட்’. அந்தளவிற்கு இச்சொல்லை உலக அளவில் பலரையும் மொழியவைத்தனர் அஜித்தின் ரசிகர்கள்.

இந்நிலையில் தான், வலிமை திரைப்படத்தின் முதல் அப்டேட்டாக அப்படத்தின் முதல் பார்வை போஸ்டர் வெளியானது. அதைத் தொடர்ந்து வலிமை கிளிம்ஸ், ‘வேற மாரி’ பாடல், ‘அம்மா’ பாடல், மேக்கிங் வீடியோ, ட்ரைலர் உள்ளிட்ட அப்டேட்டுகள் தொடர்ந்து விடப்பட்டன.

இதைத் தொடர்ந்து, வலிமை திரைப்படத்தின் வெளியீடு குறித்த அறிவிப்பும் வெளியானது. அதன்படி வலிமை திரைப்படம், பொங்கலை முன்னிட்டு இவ்வருடம் ஜனவரி 13-ல் வெளியிடப்பட திட்டமிடப்பட்டிருந்தது. இதனால் ரசிகர்கள் மகிழ்ச்சியில் மூழ்கினர்.

ஆனால் கொரோனா பொதுமுடக்கம், திரையரங்க இருக்கை குறைப்பு உள்ளிட்ட காரணங்களால், வலிமை வெளியீடு ஒத்திவைக்கப்படுவதாக வெளியான அறிவிப்பு அஜித் ரசிகர்களை பேரிடியாய்த் தாக்கியது.

இதையடுத்து, மீண்டும் தலைதூக்கிய ‘வலிமை அப்டேட்’ கேள்விகளுக்கு முற்றுப்புள்ளி வைக்கும் விதமாக, தற்சமயம் வெளியாகியுள்ளது வலிமை படத்தின் வலிமையான அப்டேட்.

அதன்படி, வலிமை திரைப்படம், தமிழ், கன்னடம், இந்தி, தெலுங்கு உள்ளிட்ட மொழிகளில் பிப்ரவரி 24-ஆம் தேதி திரையரங்குகளில் வெளியாகவிருப்பதாக படக்குழு அறிவித்துள்ளது. இதையடுத்து அஜித் ரசிகர்கள் பெரும் ஆரவாரத்தில் திளைத்துவருகின்றனர்.

பதிவு: February 02, 2022
அஜித் ,வலிமை,போனி கபூர் ,வலிமை அப்டேட்,தேதி
கொரோனாவால் சத்யராஜ் மருத்துவமனையில் அட்மிட!- நடிகை த்ரிஷா வீட்டில் குவாரண்டையன்

கொரோனாவால் பாதிக்கப்பட்டுள்ள நடிகர் சத்யராஜ் மருத்துவமனையில் அனுமதிக்கப்பட்டுள்ளார். நடிகை த்ரிஷா லண்டனில் உள்ள வீட்டில் தன்மை தனிமைப்படுத்தியுள்ளார்.

நாடு முழுவதும் கொரோனா மற்றும் ஒமிக்ரான் தொற்று தீவிரமாக பரவி வருகிறது. இன்று ஒருநாள் மட்டும் தமிழகத்தில் 8000-க்கும் மேற்பட்டவர்களுக்கு கொரோனா தொற்று கண்டறியப்பட்டுள்ளது. இந்த நிலையில் தற்போது திரையுலகத்தைச் சேர்ந்த முன்னணி நடிகர், நடிகைகளுக்கு கொரோனா தொற்று உறுதியாகி வருகிறது.

சமீபத்தில் தனது நெருங்கிய தோழிகளுடன் கிறிஸ்துமஸ் மற்றும் 2022 புத்தாண்டு கொண்டாட லண்டன் சென்றார் த்ரிஷா. அங்கு அவருக்கு லேசான காய்ச்சல் மற்றும் இருமல் ஏற்பட்டது. இதையடுத்து மருத்துவமனை சென்று பரிசோதனை செய்துகொண்டார். இதில் அவருக்கு கொரோனா தொற்று ஏற்பட்டிருப்பது உறுதி செய்யப்பட்டது. இதையடுத்து அங்குள்ள வீட்டில் தன்னை தனிமைப்படுத்திக் கொண்டு சிகிச்சை பெற்றார்.

இந்த நிலையில், நடிகை த்ரிஷா தனக்கு கொரோனா தொற்று உறுதியான தகவலை, அவரது ட்விட்டர் பக்கத்தில் வெளியிட்டுள்ளார். அனைத்து முன்னெச்சரிக்கைகள் மற்றும் பாதுகாப்பு நடவடிக்கைகளை பின்பற்றிய போதிலும், புத்தாண்டுக்கு சற்று முன்பு தனக்கு கொரோனா தொற்று உறுதி ஆனது. இருப்பினும் தடுப்பூசி எடுத்துக்கொண்டதன் விளைவாக தனக்கு பெரிதாக பாதிப்பு ஏதும் ஏற்படவில்லை. தற்போது லண்டனில் இருக்கிறேன். சில பரிசோதனைகள் முடிந்த பிறகு கொரோனா நெகட்டிவ் வந்ததும் சென்னை திரும்புவேன். அனைவரும் பாதுகாப்பாக இருங்கள். முகக்கவசம் அணியுங்கள். கொரோனா தடுப்பு விதிகளை கண்டிப்பாக கடைபிடியுங்கள்" என்று கூறியுள்ளார்.

அதே போல் நடிகர் சதய்ராஜுக்கு கொரோனா தொற்று உறுதி செய்யப்பட்டுள்ளது. இதையடுத்து அவர் மருத்துவமனையில் அனுமதிக்கப்பட்டு சிகிச்சை பெற்று வருகிறார். மேலும் இயக்குனநர் பிரியதர்ஷன், நடிகர்கள் மகேஷ்பாபு, அருண் விஜய் உள்ளிட்டோருக்கு கொரோனா தொற்று உறுதி செய்யப்பட்டுள்ளது.

இதனால் படப்பிடிப்பு தளங்களில் கொரோனா தொற்று பரவல் அதிகரிக்கலாம் என்ற அச்சம் ஏற்பட்டுள்ளது. இதனை தொடர்ந்து பாதுகாப்பு தளங்களில் கட்டுப்பாடுகள் விதிக்கப்படலாம் என தகவல் வெளியாகியுள்ளது.

பதிவு: January 08, 2022
சத்யராஜ், த்ரிஷா, கொரோனா, Sathyaraj, Trisha, Corona
`என்னை `தல'ன்னு அழைக்காதீங்க!'‍- ரசிகர்களுக்கு அஜித்குமார் அன்பு கட்டளை

"தன்னை இனி தல என்று அழைக்க வேண்டாம்" என்று ரசிகர்களுக்கு நடிகர் அஜித்குமார் வேண்டுகோள் விடுத்துள்ளார்.

தமிழ் சினிமாவை பொறுத்தவரை ரஜினி, கமலுக்கு அடுத்தபடியாக விஜய், அஜித் உள்ளனர். பொதுவாக தமிழ் சினிமாவில் ஒவ்வொரு நடிகரின் பெயருக்கு முன்பும் ஒரு அடைமொழி வைத்து கூப்பிடுவது வழக்கமாக இருந்து வருகிறது. அந்த வகையில் விஜய்க்கு இளைய தளபதி என்றும் அஜித்திற்கு ஆசை நாயகன், அல்டிமேட் ஸ்டார் என்றும் அடைமொழி உண்டு. இவற்றையெல்லாம் கடந்து ரசிகர்கள் அவருக்கு செல்லமாக வைத்த `தல' என்ற அடைமொழி தான் இன்றளவும் மனதில் நிலைத்து நின்றது. நடிகர் அஜித்தை அவரது ரசிகர்கள் மட்டுமல்ல, திரையுலகை சேர்ந்த பலரும் செல்லமாக தல என்றே கூப்பிட்டு வருகின்றனர்.

இந்நிலையில், தமிழ் சினிமாவில் உச்ச நடிகராக இருக்கும் அஜித் தனது ரசிகர்களுக்கு வேண்டுகோள் விடுத்து அறிக்கை ஒன்றை வெளியிட்டுள்ளார். அதில், ``பெரும் மரியாதைக்குரிய ஊடக, பொது ஜன மற்றும் என் உண்மையான ரசிகர்களுக்கு வணக்கம். இனி வரும் காலங்களில் என்னை பற்றி எழுதும் போதோ, என்னை பற்றி குறிப்பிட்டு பேசும் போதோ என் இயற்பெயரான அஜித்குமார் மற்றும் அஜித் என்றோ அல்லது ஏ.கே என்றோ குறிப்பிட்டால் போதுமானது.

தல என்றோ வேறு ஏதாவது பட்ட பெயர்களையோ குறிப்பிட்டு அழைக்க வேண்டாம் என்று அன்போடு வேண்டுகோள் விடுக்கிறேன். உங்கள் அனைவரின் ஆரோக்கியம், உள்ள உவகை, வெற்றி, மன அமைதி, மன நிறைவு உள்ளிட்ட சகலமும் கிடைக்க வாழ்த்துகிறேன்" என தெரிவித்துள்ளார்.

 

 

பதிவு: December 01, 2021
அஜித்குமார், அஜித் ரசிகர்கள், தல அஜித், Ajithkumar, Ajith fans
`ஜெய் பீம்’ படம் பார்த்தேன், கண்கள் குளமானது”- கமல்ஹாசன் நெகிழ்ச்சி

``ஜெய் பீம்’ படம் பார்த்தேன் கண்கள் குளமானது” என்று தனது ட்விட்டரில் கருத்து தெரிவித்திருக்கிறார் நடிகர் கமல்ஹாசன்.

இயக்குநர் தா.செ.ஞானவேல் எழுதி இயக்கும் ’ஜெய் பீம்’ படத்தை தயாரித்து நடித்துள்ளார் சூர்யா. ரஜிஷா விஜயன், பிரகாஷ் ராஜ் முக்கியமான கதாபாத்திரத்தில் நடித்துள்ளார்கள். ஓய்வுபெற்ற நீதிபதி சந்துரு வழக்கறிஞராக இருக்கும்போது இருளர் இன மக்களுக்காக வாதாடிய ஒரு வழக்கினையே அடிப்படையாகக் கொண்டு ‘ஜெய் பீம்’ படத்தினை எடுத்திருக்கிறார்கள்.

இன்று வெளியாகியுள்ள படத்தை படக்குழுவினருடன் பார்த்தார் நடிகர் கமல்ஹாசன், படம் பார்த்த பின்னர் படக்குழுவினருடன் புகைப்படம் எடுத்துக்கொண்டார். அந்த புகைப்படத்தை ட்விட்டரில் பதிவு செய்துள்ளார். “ஜெய் பீம் பார்த்தேன். கண்கள் குளமானது. பழங்குடியினரின் இன்னல்களை அழுத்தமாக வெளிப்படுத்தி இருக்கிறார் இயக்குநர் ஞானவேல். பொதுச் சமூகத்தின் மனசாட்சிக்குக் குரலற்றவர்களின் குமுறல்களைக் கொண்டு சேர்த்த சூர்யா மற்றும் ஜோதிகா மற்றும் படக்குழுவினருக்கு என் மனமார்ந்த பாராட்டுக்கள்” என்று தெரிவித்துள்ளார்.

பதிவு: November 02, 2021
ஜெய் பீம், கமல்ஹாசன், JaiBhim, Kamal haasan
தற்போதைய செய்திகள்
இந்திய செய்திகள்