Today is Thursday 2022 Jan 27
BREAKING NEWS:
சென்னை
அமைதி, நல்லிணக்கம், ஒற்றுமை செழிக்கட்டும்- டாக்டர் ராமதாஸ், அன்புமணி, கி.வீரமணி பொங்கல் வாழ்த்து…

அமைதி, நல்லிணக்கம், ஒற்றுமை செழிக்கட்டும் என்று டாக்டர் ராமதாஸ், அன்புமணி ராமதாஸ், கி. வீரமணி ஆகியோர் பொங்கல் வாழ்த்து தெரிவித்துள்ளனர்.

இது குறித்து பாமக நிறுவனர் ராமதாசு வெளியிட்டுள்ள வாழ்த்து செய்தியில், "தமிழர்களின் உழவையும், உழைப்பையும் போற்றும் திருநாளான தைப் பொங்கல் விழாவையும் தமிழ் புத்தாண்டையும் கொண்டாடும் தமிழ்ச் சொந்தங்களுக்கு எனது வாழ்த்துக்களைத் தெரிவித்துக் கொள்கிறேன். தமிழர் என்றொரு இனமுண்டு, தனியே அவர்க்கொரு குணமுண்டு’ என்ற நாமக்கல் கவிஞரின் வார்த்தைகளுக்கேற்ப தமிழர்களின் பெருமை மிகு தனிச்சிறப்புகளில் ஒன்று தான் தைப்பொங்கல் திருநாள் ஆகும். அதனால்தான் இத்திருநாளுக்கு தமிழர் திருநாள் என்ற பெயர் உருவானது. அதுமட்டுமின்றி, மதங்களைக் கடந்த திருநாள் என்ற பெருமையும் பொங்கலுக்கு உண்டு. இயற்கைக்கும், சூரியனுக்கும் நன்றி செலுத்துவதற்காக உருவாக்கப்பட்ட இத்திருநாளில் தமிழர்கள் வீடுகளில் தோரணம் கட்டி, புத்தாடை அணிந்து, புது நெல் குத்தி, புதுப் பானையில் பொங்கலிட்டு மற்றவர்களுக்கு கொடுத்து மகிழ்வார்கள்.

தைப் பிறந்தால் வழி பிறக்கும் என்பது தமிழர்களின் நம்பிக்கை. தமிழ்நாடு இப்போதும் ஏராளமான பிரச்சினைகளை சந்தித்துக் கொண்டு தான் இருக்கிறது. சமூக நீதி, கல்வி, வேளாண்மை, வேலைவாய்ப்பு தொடர்பான நமது கோரிக்கைகள் மிகவும் நியாயமானவை. தமிழ்ச் சொந்தங்களின் எதிர்பார்ப்புகள் அனைத்தும் நிறைவேறும்; அதற்காக நாம் சிந்திய வியர்வை ஒரு போதும் வீண் போகாது என்பதை தை பிறந்ததும் வரப்போகும் செய்திகள் அனைவருக்கும் உணர்த்தும்; நமது நம்பிக்கைகள் வெல்லும்.

தமிழர்களின் தனிச்சிறப்புகளில் ஒன்று அனைவரும் நலமாகவும், வளமாகவும் வாழ வேண்டும் என்று நினைப்பதும், வேண்டுவதும்தான். தைத் திங்கள் மற்றும் தமிழ்ப் புத்தாண்டின் வேண்டுதலும் அதுவாகத் தான் இருக்க முடியும். அதன்படியே அனைத்துத் தரப்பினரும் எல்லா நலமும் வளமும் பெற்று வாழ வேண்டும்; அனைவரின் துயரங்களும் தீர வேண்டும்; நாட்டில் நலம், வளம், அமைதி, மகிழ்ச்சி, சகோதரத்துவம் ஆகியவை செழிக்க வேண்டும். ஒட்டு மொத்தமாக, தமிழர்களின் வாழ்க்கையில் தைப்பொங்கல் திருநாளும், தமிழ்ப் புத்தாண்டும் அனைத்து நன்மைகளையும் வழங்கட்டும் என்று கூறி உலகத் தமிழர்கள் அனைவருக்கும் மீண்டும் வாழ்த்துகளை தெரிவித்துக் கொள்கிறேன்" என்று ராமதாஸ் கூறியுள்ளார்.

திராவிடர் கழகத் தலைவர் கி.வீரமணி வெளியிட்டுள்ள வாழ்த்து செய்தி: "பொங்கல் - தமிழ்ப் புத்தாண்டு வாழ்த்துகள்! நலிவுகள் மலிந்தாலும், பொலிவுகள் மீண்டும் பெருகும் என்ற நன்னம்பிக்கைப் பொங்கும் பொங்கலாக தமிழ்ப் புத்தாண்டு தைப் பொங்கல் மலரட்டும்! மலரட்டும்!! அனைவருக்கும் பொங்கல் வாழ்த்துகள்!"

பாமக இளைஞரணித் தலைவர் அன்புமணி ராமதாஸ் வாழ்த்து செய்தி: "தமிழர்களின் தனிப்பெரும் திருநாளான பொங்கல் விழாவையும், தமிழ் புத்தாண்டு நாளையும் கொண்டாடும் உலககெங்கும் உள்ள தமிழ் சகோதர, சகோதரிகளுக்கு எனது வாழ்த்துகளைத் தெரிவித்துக் கொள்கிறேன். திருவிழாக்களின் திருவிழா என்பது பொங்கல் திருவிழா தான். தமிழர்களின் வாழ்வு, வாழ்வாதாரம், கலாச்சாரம், இயற்கை வழிபாடு, உழவுத் தொழிலுக்கு உதவிய இயற்கை தொடங்கி கால்நடைகள் வரை அனைத்துக்கும் நன்றி தெரிவிக்கும் பண்பாடு, வீரத்தை வெளிப்படுத்தும் ஜல்லிக்கட்டு, நண்பர்கள் முதல் உறவுகள் வரை அனைவரும் ஒன்று கூடல் உள்ளிட்ட அத்தனை அம்சங்களையும் கொண்டிருப்பது தான் தமிழர் திருநாளின் சிறப்பு ஆகும். பொதுவாகவே திருவிழாக்கள் கடந்த கால நிகழ்வுகளையும், வெற்றிகளையும் நினைவுகூரவும், தெய்வங்களை வணங்கவும் கொண்டாடப் படுபவை ஆகும். ஆனால், பொங்கல் திருநாள் மட்டும் இயற்கையை வணங்கவும், நன்றி தெரிவிக்கவும் கொண்டாடப்படுகிறது.

தைப் பொங்கல் திருநாளுக்கு தனிச்சிறப்புகள் உள்ளன. உலகில் விலங்குகளுக்கும், பொருட்களுக்கும் நன்றி தெரிவிக்கும் உயிரினம் தமிழினம் மட்டும் தான். உழவுக்கும் அதன் மூலம் உணவுக்கு உதவிய கால்நடைகள், ஏர் உள்ளிட்ட உழவுக்கான கருவிகளை வழிபடும் வரலாறு நமக்கு மட்டும் தான் உண்டு. அதேபோல், தை பிறந்தால் வழி பிறக்கும் என்ற நம்பிக்கைக்கிணங்க தை மாதம் பிறந்தாலே தமிழர்க்கு தனி உற்சாகமும், தன்னம்பிக்கையும் உண்டாகும். அதேபோல், நமது உழைப்பும் நிச்சயம் வீண்போகாது.

தைப் பொங்கல் எப்போதும் நன்மைகளை மட்டுமே வழங்கும். அந்த வகையில் தமிழர்கள் மட்டுமின்றி ஒட்டுமொத்த உலகுக்கும் அன்பு, அமைதி, நிம்மதி, மகிழ்ச்சி, நல்லிணக்கம், ஒற்றுமை, வளர்ச்சி உள்ளிட்ட அனைத்து நலங்களையும், வளங்களையும் தைத்திங்களும், தமிழ்ப்புத்தாண்டும் வழங்க வேண்டும். பொங்கல் திருநாளில் பொங்கல் பானையில் புத்தரிசியும், பாலும் கலந்து பொங்குவதைப் போன்று, நமது வாழ்க்கையிலும் மகிழ்ச்சி பொங்க வேண்டும் என்று கூறி அனைவருக்கும் மீண்டும் வாழ்த்துகளை தெரிவித்துக் கொள்கிறேன்" என்று அன்புமணி கூறியுள்ளார்.

பதிவு: January 13, 2022
டாக்டர் ராமதாஸ்,அன்புமணி ராமதாஸ்,கி வீரமணி ,பொங்கல் வாழ்த்து
சென்னையில் 547 வாகனங்கள் இரவில் பறிமுதல்!- முழு ஊரடங்கால் போலீஸ் அதிரடி

சென்னையில் இரவு நேர ஊரடங்கில் தடையை மீறி வெளியே சுற்றிய 547 பேரின் வாகனங்கள் பறிமுதல் செய்யப்பட்டதாக சென்னை காவல் துறை தெரிவித்துள்ளது.

கொரோனா மற்றும் ஒமிக்ரான் பரவல் காரணமாக தமிழகத்தில் நேற்றிரவு முதல் இரவு நேர ஊரடங்கு அமலில் உள்ளது. ஊரடங்கு நேரத்தில் யாரும் வெளியே வர வேண்டாம் எனவும் தமிழக அரசு தெரிவித்துள்ளது. இந்த ஊரடங்கு இரவு 10 மணி முதல் அதிகாலை 5 மணி வரை அமலில் இருக்கும் என அறிவிக்கப்பட்டுள்ளது.

இந்நிலையில் பெட்ரோல் பங்க்கள், பால் விநியோகம், பத்திரிகை மற்றும் அத்தியாவசிய பொருட்கள் எடுத்துச் செல்ல வாகனங்களுக்கு மட்டும் அனுமதி வழங்கப்பட்டுள்ளது. அதேபோல் அனைத்து ஞாயிற்றுக்கிழமைகளிலும் முழு ஊரடங்கு அமல் படுத்தப்பட்டுள்ளது.

பொதுமக்கள் யாரும் தேவையின்றி வெளியே வர வேண்டாம் என்றும் தடையை மீறி வெளியே வந்தால் நடவடிக்கை எடுப்பதோடு வாகனங்களும் பறிமுதல் செய்யப்படும் என கூறப்பட்டுள்ளது. மேலும் வெள்ளி, சனி, ஞாயிற்றுக் கிழமைகளில் அனைத்து வழிபாட்டுத் தலங்களுக்கும் செல்ல தடை விதிக்கப்பட்டுள்ளது. இது தொடர்பாக அனைத்து கோயில் நிர்வாகங்களுக்கும் உரிய அறிவுரைகள் வழங்கப்பட்டுள்ளன. இதனால் பக்தர்கள் அனைவரும் கோயில்களின் வாசலில் நின்று சாமி தரிசனம் செய்து சென்றனர். மேலும் பொதுமக்கள் முகக்கவசம் இன்றி யாரும் வெளியே வரக்கூடாது என தமிழக அரசு தொடர்ந்து அறிவுறுத்தி வருகிறது. முகக்கவசம் இன்றி வெளியே வருபவர்கள் மீது சென்னை மாநகராட்சி சார்பில் அபராதம் விதிக்கப்படுகிறது.

பதிவு: January 07, 2022
சென்னை, முழு ஊரடங்கு, போலீஸ், வாகனங்கள் பறிமுதல், Chennai, full curfew, police, vehicles confiscated
மனைவியுடன் பணத்தை கொள்ளையடித்த ரயில்வே ஊழியர்!- திருவான்மியூர் பறக்கு ரயில் நிலையத்தில் நாடகமாடியது அம்பலம்

திருவான்மியூர் பறக்கு ரயில் நிலையத்தில் நடைபெற்ற கொள்ளையில் மனைவியுடன் சேர்ந்து கொள்ளையடித்து நாடகமாடிய வடமாநிலத்தை சேர்ந்த ரயில்வே ஊழியரை போலீசார் கைது செய்துள்ளனர்.

சென்னை திருவான்மியூர் பறக்கும் ரயில் நிலையத்தில் நேற்று அதிகாலை 4.30 மணி அளவில் பயணிகள் சிலர் டிக்கெட் எடுப்பதற்காக தரை தளத்தில் உள்ள டிக்கெட் கவுண்ட்டரில் வரிசையில் காத்திருந்தனர். தினசரி அதிகாலை 4 மணிக்கே திறக்கப்படும் டிக்கெட் கவுண்ட்டர் நேற்று திறக்கப்படாமல் கதவு வெளிப்புறமாக பூட்டப்பட்டு இருந்ததால் சந்தேகம் அடைந்த பயணிகள், அங்கு பாதுகாப்பு பணியில் இருந்த ரயில்வே போலீசாரிடம் இதுபற்றி கேட்டனர்.

உடனே அங்கு வந்த ரயில்வே போலீசார், வெளியே பூட்டப்பட்டிருந்த கதவை திறந்து உள்ளே சென்று பார்த்தனர். அப்போது, டிக்கெட் கவுண்ட்டர் உள்ளே ஊழியர் ஒருவர், அங்கிருந்த ஜன்னலில் கை, கால்களை பின்னால் கட்டப்பட்டு, வாயில் துணி வைத்து திணிக்கப்பட்ட நிலையில் கிடந்ததை கண்டு அதிர்ச்சி அடைந்தனர். அவரது வாயில் இருந்த துணியை எடுத்து விட்டு கை, கால் கட்டுகளை அவிழ்த்த ரயில்வே போலீசார், இதுபற்றி அவரிடம் விசாரித்தனர்.

விசாரணையில் தன்னை முகமூடி அணிந்த 3 மர்ம நபர்கள் துப்பாக்கி முனையில் மிரட்டி கட்டிப்போட்டு விட்டு டிக்கெட் விற்பனை செய்து வைத்திருந்த பணத்தை கொள்ளையடித்து சென்றதாக கூறினார். இதுகுறித்து உயர் அதிகாரிகளுக்கு ரயில்வே போலீசார் தகவல் தெரிவித்தனர். ரெயல்வே டி.ஐ.ஜி. ஜெயகவுரி, சென்னை மண்டல எஸ்.பி. அதிவீரபாண்டியன், சென்னை ரயில்வே கோட்ட பாதுகாப்புப்படை கமிஷனர் செந்தில்குமரேசன் உள்ளிட்ட உயர் அதிகாரிகள் சம்பவ இடத்துக்கு விரைந்து வந்தனர்.

சம்பவம் நடந்த இடம், ரயில் நிலைய நடைமேடைகளை ஆய்வு செய்த போலீஸ் அதிகாரிகள், ரெயில்வே ஊழியரிடம் விசாரணை நடத்தினர். விசாரணையில், ‘தனது பெயர் டீக்காராம் மீனா ( 28) என்றும், ராஜஸ்தான் மாநிலத்தை சேர்ந்தவர் என்றும், கடந்த 4 ஆண்டுகளாக தெற்கு ரயில்வேயில் டிக்கெட் கவுண்ட்டரில் டிக்கெட் விநியோகம் செய்யும் பணியில் ஈடுபட்டு வந்ததாகவும் தெரிவித்தார்.

இதையடுத்து சம்பவ இடத்துக்கு மோப்பநாய் வரவழைத்து சோதனை மேற்கொண்ட திருவான்மியூர் ரயில்வே போலீசார், இதுபற்றி 4 பிரிவுகளின் கீழ் வழக்குப்பதிவு செய்து விசாரணை நடத்தி வந்தனர். இந்நிலையில், டிக்கெட் கவுண்டரில் பணியாற்றும் ஊழியரான வடமாநிலத்தை சேர்ந்த டீக்காராமே தனது மனைவியுடன் சேர்ந்துகொண்டு பணத்தை கொள்ளையடித்துவிட்டு நாடகமாடியது தற்போது போலீசார் நடத்திய விசாரணையில் தெரியவந்துள்ளது. இதையடுத்து டீக்காராமையும், அவரது மனைவியையும் போலீசார் இன்று அதிரடியாக கைது செய்துள்ளனர்.

ரயில் நிலையத்தில் சிசிடிவி கேமரா இல்லாததை பயன்படுத்திக்கொண்ட டீக்காராம் தனது மனைவியுடன் இணைந்து இந்த கொள்ளை நாடகத்தை அரங்கேற்றியுள்ளார். நேற்று அதிகாலை டீக்காராம் ரயில் நிலையத்திற்கு சென்றுள்ளார். அவர் சென்ற சில நிமிடங்களில் அவரது மனைவி சரஸ்வதி பின் தொடர்ந்து ரயில் நிலையத்திற்குள் சென்றுள்ளார். அங்கு டிக்கெட் விற்பனை செய்து வைத்திருந்த ரூ.1.32 லட்சம் பணத்தை டீக்காராம் தனது மனைவியிடம் எடுத்துக்கொடுத்துள்ளார். மேலும், கொள்ளைப்போனது போல பிம்பத்தை உருவாக்க மனைவியை தனது கை, கால்காளை கட்டிவிட்டு வாயில் துணியை வைத்து செல்லும்படி கூறியுள்ளார். இதனையடுத்து, டீக்காராமின் மனைவி பணம் ரூ.1.32 லட்சத்தை எடுத்துக்கொண்டு தனது கணவன் கூறியபடி அவரது கை,கால்களையும், வாயையும் கட்டிவிட்டு ரெயில் நிலையத்தில் இருந்து வெளியே சென்றுள்ளார்.

ரயில் நிலையத்தில் சிசிடிவி கேமரா இல்லாதபோது அதற்கு அருகே உள்ள சிசிடிவி கேமராக்களை ஆய்வு செய்த போலீசார் டீக்காராமும், அவரது மனைவியும் ரயில் நிலையத்திற்குள் செல்வதை கண்டுபிடித்துள்ளனர். அவர்களிடம் நடத்திய விசாரணையில் ரயில்வே பணம் ரூ. 1.32 லட்சத்தை தாங்களே கொள்ளையடித்துவிட்டு கொள்ளைப்போனதாக நாடகமாடியது தெரியவந்துள்ளது.

இதனையடுத்து, ரயில்வே ஊழியரான வடமாநிலத்தை சேர்ந்த டீக்காராமையும், அவரது மனைவியையும் போலீசார் கைது செய்துள்ளனர். அவர்களிடமிருந்து கொள்ளையடிக்கப்பட்ட ரயில்வே பணம் ரூ.1.32 லட்சத்தை போலீசார் மீட்டுள்ளனர். மேலும், கைது செய்யப்பட்ட இருவரிடமும் போலீசார் தீவிர விசாரணை நடத்தி வருகின்றனர்.

பதிவு: January 04, 2022
திருவான்மியூர் ரயில் நிலையம், கொள்ளை, ரயில்வே ஊழியர் கைது, ரயில்வே போலீஸ்,Thiruvanmiyur railway station robbery, railway employee arrested, railway police
`சென்னையில் கொரோனாவால் பாதிக்கப்பட்ட தெரு, நோய் கட்டுப்பாட்டு பகுதியாக அறிவிப்பு!'- அமைச்சர் மா.சுப்பிரமணியன்

சென்னை அசோக் நகரில் எல்.ஜி.ஜி.எஸ்.காலனி 19வது தெருவில் உள்ள 2 வீடுகளில் 10 பேர் கொரோனாவால் பாதிக்கப்பட்ட தெரு, நோய் கட்டுப்பாட்டு பகுதியாக அறிவிக்கப்பட்டுள்ளதாக அமைச்சர் மா.சுப்பிரமணியன் தெரிவித்தார்.

சென்னையில் கொரோனா பாதிப்பு நாளுக்கு நாள் அதிகரித்து வருகிறது. சென்னை அசோக் நகர் எல்.ஜி.ஜி.எஸ் காலனியில் 19வது தெருவில் உள்ள 2 வீடுகளில் வசிக்கும் 10 பேருக்கு கொரோனா பாதிப்பு ஏற்பட்டுள்ளது. இந்த நிலையில், அசோக்நகரில் தனிமைப்படுத்தப்பட்ட பகுதியில் மக்கள் நல்வாழ்வுத்துறை அமைச்சர் மா.சுப்பிரமணியன், சுகாதாரத்துறை செயலாளர் ராதாகிருஷ்ணன், சென்னை மாநகராட்சி ஆணையர் ககன் தீப் சிங் பேடி ஆகியோர் ஆய்வு மேற்கொண்டனர்.

இதன் பின்னர் செய்தியாளர்களிடம் பேசிய அமைச்சர் மா.சுப்பிரமணியன், "சென்னையில் 3 இடங்களில் கொரோனா கேர் சென்டர்கள் அமைக்கப்பட்டு 500 கொரோனா படுக்கைகள் தயார் நிலையில் உள்ளன. சென்னை வர்த்தக மையத்தில் 800 ஆக்சிஜன் வசதியுடன் கூடிய படுக்கைகள் தயார்ப்படுத்தப்பட்டு வருகின்றன. தமிழகத்தில் 15 முதல் 18 வயதுள்ள மாணவர்கள் 33,20,000 பேருக்கு தடுப்பூசி போட வேண்டி இருக்கிறது. வரும் 3ம் தேதி போரூரில் உள்ள அரசு மகளிர் மேல்நிலைப்பள்ளியில் முதல்வர் மு.க.ஸ்டாலின் தடுப்பூசி போடும் பணியை தொடங்கி வைக்கிறார். தொடர்ந்து தமிழகம் முழுவதும் உள்ள பல்வேறு பள்ளிகளில் இந்த பணி தொடர்ந்து நடைபெற உள்ளது. பள்ளி நாட்களில் மாணவர்களுக்கு தடுப்பூசி போடும் திட்டம் குறித்து நடவடிக்கை எடுக்கப்பட்டு வருகிறது. ஜனவரி 10ம் தேதி முதல் 60 வயது மேற்பட்டவர்களுக்கு பூஸ்டர் டோஸ் போடும் பணி சென்னையில் தொடங்கப்படும்.

தமிழகத்தில் மொத்தம் 45 பேருக்கு ஒமிக்ரான் தொற்று ஒன்றிய அரசின் பரிசோதனையில் உறுதிப்படுத்தப்பட்டது. இந்த 45 பேரில் 16 பேர் தற்போது சிகிச்சை பெற்று வருகின்றனர். இதுவரை 129 பேருக்கு ஒமிக்ரானுக்கான அறிகுறி கண்டுபிடிக்கப்பட்டுள்ளது. இந்த 129 பேரின் மாதிரிகளும் ஒன்றிய அரசின் பரிசோதனைக்கு அனுப்பப்பட்டுள்ளது. இதுவரை தமிழகத்தில் ஒமிக்ரானால் பாதிக்கப்பட்ட அனைவருமே முதல்நிலை தொற்றிலேயே உள்ளனர். யாருக்கும் ஆக்சிஜன் வசதி தேவைப்படவில்லை.

சென்னையில் உள்ள 39,537 தெருக்களில் 507 தெருக்களில் கொரோனா நோய் தொற்று கண்டறியப்பட்டுள்ளது. 429 தெருக்களில் 3 பேருக்கும் குறைவாகவே தொற்று எண்ணிக்கை உள்ளது. எனவே தெருக்களில் கட்டுப்பாடுகள் விதிக்கப்படவில்லை. பாதிக்கப்பட்டவர்கள் வீட்டு தனிமையிலும், மருத்துவமனையிலும் உள்ளனர். கடந்த சில நாட்களில் 78 தெருக்களில் 42க்கும் மேற்பட்ட தெருக்களில் கொரோனா தொற்றுகளின் எண்ணிக்கை 4க்கும் அதிகமாக உள்ளது" என்று கூறினார்.

பதிவு: December 29, 2021
சென்னை, கொரோனா, அசோக்நகர், அமைச்சர் மா.சுப்பிரமணியன், Chennai, Corona, Ashoknagar, Minister MaSubramanian
சென்னையில் இடிந்து விழுந்த குடிசை மாற்று வாரிய குடியிருப்பு கட்ட‌டம்!- உயிர் தப்பிய 24 வீடுகளில் இருந்த மக்கள்

சென்னை திருவொற்றியூரில் குடிசை மாற்று வாரிய குடியிருப்பு கட்ட‌டம் இடிந்து விழுந்த விபத்தில் 24 வீடுகள் தரைமட்டமாகி உள்ளது. விரிசல் ஏற்பட்டதால் அதிகாலையிலேயே மக்கள் வீட்டை விட்டு வெளியேறியதால் பெரும் உயிரிழப்பு தவிர்க்கப்பட்டது.

சென்னை திருவொற்றியூரில் உள்ள அரிவாக்குப்பத்தில் 23 ஆண்டுகள் பழமை வாய்ந்த குடிசை மாற்று வாரிய குடியிருப்பு கட்ட‌டம் செயல்பட்டு வந்தது. இந்த டி பிளாக் குடியிருப்பு கட்டடத்தில் நேற்று இலேசான விரிசல் ஏற்பட்டுள்ளது. இன்று அதிகாலையில் தரைதளத்தில் உள்ள வீட்டில் பெரிய விரிசல் ஏற்பட்டது. இதையடுத்து, அந்த குடியிருப்பில் இருந்த மக்கள் அவசரம் அவசரமாக வெளியேற்றப்பட்டனர். இந்த நிலையில், இன்று காலை குடியிருப்பு இடிந்து விழுந்து விபத்து ஏற்பட்டுள்ளது. இந்த விபத்தினால் 24 வீடுகள் தரைமட்டமாகி உள்ளதாக தகவல்கள் தெரிவிக்கின்றன.

வீடுகள் இடிந்துவிட்டதால் மக்கள் அருகில் உள்ள சமூக நலக் கூடங்களில் தங்க வைக்கப்பட்டுள்ளனர். அவர்களுக்கு உணவுகள் வழங்க ஏற்பாடு செய்யப்பட்டு வருகிறது.

தற்போது கட்டட இடிபாடுகளில் யாரேனும் சிக்கி உள்ளனரா என்பது குறித்து தீயணைப்பு படை வீரர்கள் தேடி வருகிறார்கள். மேலும் இடிபாடுகளை அகற்றும் பணியிலும் தீயணைப்புத்துறை வீர‌ர்கள் தீவிரமாக ஈடுபட்டுள்ளனர்.

பதிவு: December 27, 2021
சென்னை, திருவொற்றியூர், குடிசை மாற்று வாரியம், தமிழக அரசு, Chennai, Tiruvottiyur, Housing Board, TamilNadu Government
`மாணவர்களுக்கு கேள்வியும், பதிலும் கொடுத்து விடுகிறார்கள் ஆசிரியர்கள்!'- தமிழகத்தில் சிபிஎஸ்இ பள்ளிகளில் நடக்கும் அவலம்

தமிழ்நாட்டில் சில சிபிஎஸ்இ பள்ளிகளில் 10 மற்றும் 12 ஆம் வகுப்பு பொதுத் தேர்வுகளுக்கான கேள்வித்தாள்கள் முன்கூட்டியே வெளியிடப்படுவதாகவும், தேர்வில் மாணவர்களுக்கு ஆசிரியர்கள் உதவுவதாகவும் குற்றச்சாட்டு எழுந்திருக்கிறது.

சிபிஎஸ்இ பள்ளிகளில் இந்த கல்வியாண்டு முதல் 10 மற்றும் 12 ஆம் வகுப்பு பொதுத் தேர்வுகள் 2 கட்டங்களாக நடைபெறுகின்றன. விடையை மட்டும் குறிக்கும் வகையிலான முதல் கட்ட தேர்வு டிசம்பர் மாதத்திலும், விரிவான விடை அளிக்கும் வகையிலான 2 ஆம் கட்ட தேர்வு மார்ச் மாதத்திலும் நடைபெறும் எனவும் புதிய தேர்வு நடைமுறை அறிமுகப்படுத்தப்பட்டுள்ளது.

அதன்படி, தற்போது நடைபெற்ற முதற்கட்ட தேர்வில் பல சிபிஎஸ்இ பள்ளிகள் குளறுபடியில் ஈடுபட்டிருப்பதாக குற்றச்சாட்டு எழுந்துள்ளது. இது தொடர்பாக சிபிஎஸ்இ பள்ளிகள் மேலாண் கூட்டமைப்பினர் சிபிஎஸ்இ அமைப்புக்கு 8 பக்க கடிதம் அனுப்பியுள்ளனர். அதில், முதல் கட்ட பொதுத் தேர்வுக்கான கேள்வித் தாள்களையும், விடைகளையும் தேர்வு நடைபெறுவதற்கு முன்பே மாணவ, மாணவிகளுக்கு சில பள்ளியின் ஆசிரியர்கள் வழங்கியதாக குற்றம் சாட்டப்பட்டுள்ளது. மேலும் விடை தெரியாத கேள்விகளுக்கு விடை தேர்வை ஆங்கில எழுத்தான 'c ' என குறிப்பிட வேண்டுமென மாணவர்களுக்கு அறிவுறுத்தப்பட்டுள்ளதாகவும், அவ்வாறு 'c ' என குறிப்பிட்டுள்ள கேள்விக்கான பதில் a, b ,d என எந்த தெரிவாக இருந்தாலும் அதனை ஆசிரியர்களே மாற்றியமைத்துக் கொள்வதாகவும் குற்றம் சாட்டப்பட்டுள்ளது.

முதல்கட்ட தேர்வில் வழங்கப்படும் மதிப்பெண்கள், 2 ஆம் கட்ட தேர்வில் கணக்கில் எடுத்துக்கொள்ளப்படும் என்பதால் இது போன்ற குளறுபடிகள் நடைபெறுவதாக கூறப்படுகிறது. பள்ளியை சாராத ஒரே ஒரு நபர் மட்டுமே கண்காணிப்பாளராக நியமிக்கப்படுவதால் எளிதில் குளறுபடிகள் நடைபெறுவதாகவும், இதனால் பல சிபிஎஸ்இ பள்ளிகளில் சுமார் 20 மாணவர்கள் வரை முழு மதிப்பெண்களை பெறுவதோடு, பள்ளியிலும் 100% தேர்ச்சி காட்டப்படுவதாகவும் குற்றம் சாட்டப்பட்டுள்ளது. எனவே அண்மையில் நடைபெற்ற சிபிஎஸ்இ முதல்கட்ட பொதுத் தேர்வை ரத்து செய்ய வேண்டும் என அந்த பள்ளிகளின் மேலாண் கூட்டமைப்பினர் கோரிக்கை விடுத்துள்ளனர்.

பதிவு: December 24, 2021
சிபிஎஸ்இ பள்ளி, மாணவர்கள், சிபிஎஸ்இ பொதுத் தேர்வு, ஆசிரியர்கள், தமிழ்நாடு, CBSE School, Students, CBSE General Examination, Teachers, Tamil Nadu
அதிகம் வாசிக்கப்பட்டவை
ஆசிரியரின் தேர்வுகள்...
You May Like