புதன்கிழமை, மே 05, 2021
தமிழ்நாடு
நள்ளிரவில் வெடி மருந்துடன் வெடித்து சிதறிய கார்!- சாத்தான்குளம் அருகே அதிர்ச்சி

சாத்தான்குளம் அருகே வெடி தயாரிக்கும் மருந்துகள் இருந்த கார் வெடித்து சிதறியதால் பெரும் பரபரப்பு ஏற்பட்டுள்ளது.

தூத்துக்குடி மாவட்டம், சாத்தான்குளம் அருகே உள்ள இடைச்சிவிளை பகுதியைச் சேர்ந்த பாலகிருஷ்ணன் என்பவர் நெல்லை மாவட்டம் அணைக்கரை பகுதியில் பட்டாசு தயாரிக்கும் தொழிற்சாலை நடத்தி வருகிறார். இந்த நிலையில் நேற்று இரவு பாலகிருஷ்ணன் தனது காரில் பயங்கர வெடி பொருட்களை தனது வீட்டிற்கு கொண்டு வந்துள்ளார். பின்னர் இரவு நேரத்தில் அவரது காரிலிருந்து அலாரம் அடித்துள்ளது. இதனால் பாலகிருஷ்ணன் தனது காரில் உள்ள ரிமோட் மூலம் காரை லாக் செய்துள்ளார்.

பின்னர் சிறிது நேரத்தில் வீட்டில் தூங்கிக் கொண்டிருந்த போது அவரது காரில் இருந்து வெடி சத்தம் கேட்டுள்ளது. மீண்டும் சிறிது நேரத்தில் பயங்கர சத்தத்துடன் கார் வெடித்து சிதறியுள்ளது. இதனால் இரவு நேரத்தில் அக்கம் பக்கத்தில் உள்ள பொதுமக்கள் அனைவரும் மிகுந்த அச்சத்துடன் சம்பவ இடத்திற்கு வந்து பார்த்தபோது காரின் பாகங்கள் அனைத்தும் தனித்தனியாக ஊர் முழுவதும் வெடித்து சிதறியது தெரியவந்துள்ளது.

பட்டாசு தயாரிக்கும் வெடிமருந்தை சட்டவிரோதமாக காரில் ஏற்றி வந்தது குறித்து பொதுமக்கள் புகார் தெரிவித்துள்ளனர். நள்ளிரவு நேரம் என்பதால் பொதுமக்கள் நடமாட்டம் இல்லாத காரணத்தினால் உயிர்சேதம் அனைத்தும் தவிர்க்கப்பட்டது. இந்த சம்பவம் குறித்து தட்டார்மடம் போலீசார் வழக்குப்பதிவு செய்து பாலகிருஷ்ணன் கைது செய்து விசாரணை நடத்தி வருகின்றனர்.

பதிவு: January 01, 1970
சாத்தான்குளம், வெடி மருந்து, கார் விபத்து, Sattankulam, explosives, car accident
குறைந்து வருகிறது விலை!- தங்கம் வாங்க இதுதான் சரியான நேரம் மக்களே!

தங்கம் விலை அதிரடி குறைவால் வாடிக்கையாளர்கள் நிம்மதி அடைந்துள்ளனர். இதனால் பலர் தங்கம் வாங்க ஆர்வம் காட்டி வருகின்றனர்.

இந்த செப்டம்பர் மாதத் தொடக்கத்தில் விலையேற்றம் இருந்தது. ஆனால், வாடிக்கையாளர்களுக்கு மகிழ்ச்சி தரும் விதமாக கடந்த ஒரு வாரத்தில் தொடர்ச்சியாக தங்கம் விலை குறைக்கப்பட்டது. நேற்று சென்னையில் ஒரு கிராம் ஆபரணத் தங்கத்தின் விலை ரூ.4,369 ஆக இருந்தது. நேற்றைய முன்தினம் இதன் விலை 4,371 ரூபாயாக இருந்தது. அதேபோல, 34,968 ரூபாய்க்கு விற்பனை செய்யப்பட்ட 8 கிராம் ஆபரணத் தங்கம் 16 ரூபாய் குறைந்து 34,968 ரூபாய்க்கு வந்துள்ளது.

இந்நிலையில் சென்னையில் 22 கேரட் ஆபரணத் தங்கத்தின் விலை சவரனுக்கு ரூ.112 குறைந்து ரூ.34,840க்கு விற்பனை செய்யப்படுகிறது. சென்னையில் 22 கேரட் ஆபரணத் தங்கத்தின் விலை கிராமுக்கு ரூ.14 குறைந்து ரூ.4,355க்கு விற்பனை ஆகிறது. சென்னையில் ஒரு கிராம் வெள்ளியின் விலை 70 காசு குறைந்து ரூ.63.50க்கு விற்பனை செய்யப்படுகிறது.

தங்கம் விலை அதிரடி குறைவால் வாடிக்கையாளர்கள் நிம்மதி அடைந்துள்ளனர். இதனை பயன்படுத்தி வாடிக்கையாளர்கள் தங்கம் வாங்க ஆர்வம் காட்டி வருகின்றனர்.

பதிவு: January 01, 1970
தங்கம், வெள்ளி, சென்னை, பொதுமக்கள், வாடிக்கையாளர்கள், Gold, Silver, Chennai, Public, Customers
`டெல்டா மாவட்டங்களில் 4 நாட்களுக்கு கனமழைக்கு வாய்ப்பு!'- வானிலை ஆய்வு மையம்

தென்மேற்கு பருவக்காற்று மற்றும் வெப்ப சலனம் காரணமாக இன்று டெல்டா மாவட்டங்களில் இடி மின்னலுடன் கூடிய கனமழை பெய்ய வாய்ப்பு உள்ளதாக வானிலை ஆய்வு மையம் தெரிவித்துள்ளது.

இது தொடர்பாக சென்னை வானிலை ஆய்வு மையம் வெளியிட்டுள்ள அறிக்கையில், 'வளிமண்டல மேலடுக்கு சுழற்சி மற்றும் வெப்பச்சலனம் காரணமாக நாளை டெல்டா மாவட்டங்கள் , புதுக்கோட்டை மாவட்டங்களில் ஒரு சில இடங்களில் இடி மின்னலுடன் கூடிய கனமழை பெய்யக்கூடும். வருகின்ற 19ம் தேதி டெல்டா மாவட்டங்கள் அரியலூர், பெரம்பலூர், கடலூர், சேலம், கள்ளக்குறிச்சி, திருவண்ணாமலை, புதுக்கோட்டை மாவட்டங்களில் ஒரு சில இடங்களில் இடி மின்னலுடன் கூடிய மிக கனமழை பெய்யக்கூடும். வரும் 20ம் தேதி தென் மாவட்டங்கள், டெல்டா மாவட்டங்கள் மற்றும் காரைக்கால் பகுதிகளில் ஒரு சில இடங்களில் இடி மின்னலுடன் கூடிய மழை பெய்யக்கூடும்.

அதேபோல் கடலோர மாவட்டங்கள் மற்றும் புதுச்சேரி, காரைக்கால் பகுதிகளில் ஒரு சில இடங்களில் இடியுடன் கூடிய லேசானது முதல் மிதமான மழை பெய்யக்கூடும். சென்னையை பொருத்தவரை அடுத்த 24 மணி நேரத்திற்கு ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடி மின்னலுடன் கூடிய லேசானது முதல் மிதமான மழை பெய்யக்கூடும். அதிகபட்ச வெப்பநிலை 36 மற்றும் குறைந்தபட்ச வெப்பநிலை 26 டிகிரி செல்சியஸ் ஒட்டியிருக்கும்' என்று கூறப்பட்டுள்ளது.

பதிவு: January 01, 1970
டெல்டா மாவட்டம், கனமழை, சென்னை வானிலை ஆய்வு மையம், Delta District, Heavy Rain, Chennai Meteorological Center
`தலைமையும் சரியில்லை; கூட்டணி தர்மத்தையும் காப்பாற்றவில்லை!'- அதிமுக மீது ராமதாஸ் சரமாரி குற்றச்சாட்டு

"சரியான தலைமை இல்லாததால், அதிமுக தொண்டர்கள் நமக்கு முழு ஒத்துழைப்பு தரவில்லை. சட்டமன்றத் தேர்தலில் கூட்டணி தர்மத்தை அதிமுக காப்பாற்றவில்லை" என பாமக நிறுவனர் ராமதாஸ் குற்றம்சாட்டியுள்ளார்.

2019ம் ஆண்டு மக்களவைத் தேர்தலில் அதிமுக கூட்டணியில் இணைந்த பாமக, 7 இடங்களில் போட்டியிட்டு தோல்வியைத் தழுவியது. கூட்டணியின்போது ஏற்பட்ட ஒப்பந்தத்தின் படி அதிமுகவின் ஆதரவோடு மாநிலங்களவை உறுப்பினரானார் அன்புமணி ராமதாஸ். அதன்பிறகு வந்த ஊரக உள்ளாட்சித் தேர்தல், 2021 சட்டமன்றத் தேர்தலிலும் அதிமுகவுடன் பாமக கூட்டணி தொடர்ந்தது. சட்டமன்றத் தேர்தலில் 23 இடங்களில் போட்டியிட்ட பாமக 5ல் வெற்றிபெற்றது.

வரும் அக்டோபர் மாதம் நடைபெறவுள்ள 9 மாவட்ட ஊரக உள்ளாட்சித் தேர்தலிலும் அதிமுகவுடன் பாமகவின் கூட்டணி தொடரும் என எதிர்பார்க்கப்பட்டது. ஆனால், தனித்துப் போட்டி என்ற அதிரடியாக அறிவித்துள்ளது பாமக.

இந்த நிலையில் கட்சி நிர்வாகிகள் மத்தியில் காணொலி வாயிலாக கலந்துரையாடியுள்ளார் பாமக நிறுவனர் ராமதாஸ். அப்போது, சட்டமன்றத் தேர்தலில் கூட்டணி தர்மத்தை அதிமுக காப்பாற்றவில்லை என்று குறிப்பிட்ட ராமதாஸ், பாமகவால் கூட்டணிக் கட்சிகள் பலன் அடைந்ததாகவும், அவர்களால் பாமகவுக்கு எந்த பலனும் இல்லை என்றும் குற்றம்சாட்டினார்.

சரியான தலைமை இல்லாததால், அதிமுக தொண்டர்கள் நமக்கு முழு ஒத்துழைப்பு தரவில்லை என்று கூறிய அவர், ஊரக உள்ளாட்சி தேர்தலில் தனித்து நின்று பாமகவின் வாக்கு சதவீதத்தை நிரூபிப்போம் என்றும் நிர்வாகிகளுக்கு அறிவுறுத்தினார். ” புதியதொரு விதி செய்வோம், அதை எந்நாளும் காப்போம் ” என்ற முழக்கத்துடன் தனது உரையை முடித்தார்.

பதிவு: January 01, 1970
அதிமுக, பாமக, ராமதாஸ், admk, pmk, ramadoss
`பிரமாணப் பத்திரம் போதாது; ஊர் முக்கியஸ்தர் உறுதி அளித்தால் ஜாமீன்!'- குடிமன்னர்களை தெறிக்கவிட்ட நீதிபதி

உயர்நீதிமன்ற நீதிபதி கூறியதின் பேரில் "இனி மது குடிக்க மாட்டோம்" என்று பிரமாண பத்திரம் தாக்கல் செய்த குடிமன்னர்கள் இரண்டு பேருக்கு ஜாமீன் வழங்க முடியாது என்று நீதிபதி கூறிவிட்டார்.

திருச்சியைச் சேர்ந்த சிவக்குமார் மற்றும் கார்த்திகேயன் ஆகியோர், நண்பர்களுடன் ஒன்றாக மது அருந்தியபோது தகராறு ஏற்பட்டுள்ளது. இதில், ஒருவர் மது பாட்டிலால் தாக்கப்பட்ட வழக்கில் இவர்களை போலீஸார் கைது செய்து சிறையில் அடைத்தனர். இந்த வழக்கில் ஜாமீன் கோரி இருவரும் உயர் நீதிமன்றக் கிளையில் மனு தாக்கல் செய்துள்ளனர்.

இந்த மனுவை விசாரித்த நீதிபதி பி.புகழேந்தி, ‘‘அதிகளவிலான இளைஞர்கள் மது அருந்துவதால் தான் இது போன்ற பிரச்னைகள் ஏற்படுகின்றன. இந்த இரு இளைஞர்களுக்கும் மது அருந்தும் பழக்கம் இல்லாமல் இருந்திருந்தால் இந்த வழக்கே வந்திருக்காது. எனவே, மனுதாரர்கள் இருவரும் இனிமேல் குடிக்க மாட்டோம் என பிரமாணப் பத்திரம் தாக்கல் செய்தால், ஜாமீன் வழங்கப்படும்’’ என்றார். இதை ஏற்பதாக மனுதாரர் வழக்கறிஞர் தெரிவித்தார். இதையடுத்து மனு மீதான விசாரணையை இன்று தொடர்ந்தது. அப்போது, இனி மது குடிக்க மாட்டோம் என்று சிவக்குமார் மற்றும் கார்த்திகேயன் பிரமாண பத்திரம் தாக்கல் செய்தனர்.

ஆனால் இதனை ஏற்க மறுத்த நீதிபதி, பிரமாணப் பத்திரம் போதாது என்றும் ஊர் முக்கியஸ்தர்கள் யாராவது உறுதி மொழி வழங்க வேண்டும் என்றும் தெரிவித்தார். உறுதி மொழி வழங்கினால் ஜாமீன் பற்றி பரிசீலிக்கலாம் என்று கூறிய நீதிபதி, வழக்கை அடுத்த வாரத்திற்கு ஒத்திவைத்தார்.

பதிவு: January 01, 1970
உயர்நீதிமன்றம், நீதிபதி புகழேந்தி, ஜாமீன், High Court, Judge pugazhendhi, Bail
`ஜார்ஜ் கோட்டை சென்றதும் சட்டப்பேரவை நிகழ்ச்சி நேரலை!'- முதல்வர் ஸ்டாலின் தகவல்

``ஜார்ஜ் கோட்டையில் நடைபெறும்போது சட்டப்பேரவை நிகழ்ச்சிகளை நேரலை செய்ய நடவடிக்கை எடுக்கப்படும்'' என முதல்வர் மு.க.ஸ்டாலின் விளக்கம் அளித்துள்ளார்.

சட்டப்பேரவையில் பேசிய எதிர்க்கட்சித் தலைவர் எடப்பாடி பழனிசாமி, அனைத்து மாநகராட்சிகள், நகராட்சிகளில் சிசிடிவி கேமராக்கள் பொருத்தப்பட வேண்டும் என கோரிக்கை விடுத்தார். தொடர்ந்து, சட்டப்பேரவை நிகழ்ச்சிகளை நேரலை செய்ய நடவடிக்கை எடுக்க வேண்டும் என்றும், காவல்துறையினருக்காக உங்கள் இல்லம் திட்டத்தை தொடர்ந்து செயல்படுத்த வேண்டும் என்றும் அவர் கேட்டுக் கொண்டார்.

இதற்கு பதிலளித்து பேசிய முதல்வர் மு.க.ஸ்டாலின், 10 ஆண்டுகாலம் ஆட்சியில் இருந்த தாங்கள், சிசிடிவி கேமராக்கள் பொருத்த நடவடிக்கை எடுக்கவில்லை எனக்கூறினார்.

ஜார்ஜ் கோட்டையில் நடைபெறும்போது சட்டப்பேரவை நிகழ்ச்சிகள் ஒளிபரப்பு செய்யப்படும் என்று தெரிவித்த முதல்வர் மு.க.ஸ்டாலின், கடந்த ஆட்சியில் கொண்டுவரப்பட்ட உங்கள் இல்லம் திட்டத்தில் கட்டப்பட்ட வீடுகள் தரமாக இல்லை என்றும் தாங்கள் கொண்டு வந்த திட்டம் என்பதற்காக, அதனை கைவிட மாட்டோம் எனவும் கூறினார்.

பதிவு: January 01, 1970
ஜார்ஜ் கோட்டை, சட்டப்பேரவை, முதல்வர் ஸ்டாலின், எடப்பாடி பழனிசாமி, George Fort, TN Assembly Legislature, Chief Ministe Stalin, Edappadi Palanisamy
அதிகம் வாசிக்கப்பட்டவை
ஆசிரியரின் தேர்வுகள்...
You May Like