Today is Wednesday 2022 Jun 29
மாவட்ட செய்திகள்
சென்னையில் 547 வாகனங்கள் இரவில் பறிமுதல்!- முழு ஊரடங்கால் போலீஸ் அதிரடி

சென்னையில் இரவு நேர ஊரடங்கில் தடையை மீறி வெளியே சுற்றிய 547 பேரின் வாகனங்கள் பறிமுதல் செய்யப்பட்டதாக சென்னை காவல் துறை தெரிவித்துள்ளது.

கொரோனா மற்றும் ஒமிக்ரான் பரவல் காரணமாக தமிழகத்தில் நேற்றிரவு முதல் இரவு நேர ஊரடங்கு அமலில் உள்ளது. ஊரடங்கு நேரத்தில் யாரும் வெளியே வர வேண்டாம் எனவும் தமிழக அரசு தெரிவித்துள்ளது. இந்த ஊரடங்கு இரவு 10 மணி முதல் அதிகாலை 5 மணி வரை அமலில் இருக்கும் என அறிவிக்கப்பட்டுள்ளது.

இந்நிலையில் பெட்ரோல் பங்க்கள், பால் விநியோகம், பத்திரிகை மற்றும் அத்தியாவசிய பொருட்கள் எடுத்துச் செல்ல வாகனங்களுக்கு மட்டும் அனுமதி வழங்கப்பட்டுள்ளது. அதேபோல் அனைத்து ஞாயிற்றுக்கிழமைகளிலும் முழு ஊரடங்கு அமல் படுத்தப்பட்டுள்ளது.

பொதுமக்கள் யாரும் தேவையின்றி வெளியே வர வேண்டாம் என்றும் தடையை மீறி வெளியே வந்தால் நடவடிக்கை எடுப்பதோடு வாகனங்களும் பறிமுதல் செய்யப்படும் என கூறப்பட்டுள்ளது. மேலும் வெள்ளி, சனி, ஞாயிற்றுக் கிழமைகளில் அனைத்து வழிபாட்டுத் தலங்களுக்கும் செல்ல தடை விதிக்கப்பட்டுள்ளது. இது தொடர்பாக அனைத்து கோயில் நிர்வாகங்களுக்கும் உரிய அறிவுரைகள் வழங்கப்பட்டுள்ளன. இதனால் பக்தர்கள் அனைவரும் கோயில்களின் வாசலில் நின்று சாமி தரிசனம் செய்து சென்றனர். மேலும் பொதுமக்கள் முகக்கவசம் இன்றி யாரும் வெளியே வரக்கூடாது என தமிழக அரசு தொடர்ந்து அறிவுறுத்தி வருகிறது. முகக்கவசம் இன்றி வெளியே வருபவர்கள் மீது சென்னை மாநகராட்சி சார்பில் அபராதம் விதிக்கப்படுகிறது.

பதிவு: January 07, 2022
சென்னை, முழு ஊரடங்கு, போலீஸ், வாகனங்கள் பறிமுதல், Chennai, full curfew, police, vehicles confiscated
வடலூரில் கோலாகலமாக துவங்கியது மார்க்சிஸ்ட் கட்சி மாநாடு!

மார்க்சிஸ்ட் கம்யூனிஸ்ட் கட்சியின் கடலூர் மாவட்ட 23-வது மாநாடு வடலூர் நகரில் கோலாகலமாக எழுச்சியுடன் துவங்கியது.

2 நாட்கள் நடைபெறும் இந்த மாநாடின் துவக்க நிகழ்ச்சியாக வடலூர் பேருந்து நிலையம் அருகே மக்கள் ஒற்றுமை ஜோதி பயணம் மற்றும் கொடி பயண நிகழ்ச்சி நடைபெற்றது. நிகழ்ச்சியில் மாவட்ட செயலாளர் டி.ஆறுமுகம் தலைமை தாங்கினார். மத்தியகுழு உறுப்பினர் உ.வாசுகி சிறப்புரையாற்றினார். மக்கள் ஒற்றுமை ஜோதியினை உ.வாசுகி எடுத்துக்கொடுக்க மாவட்ட குழு உறுப்பினர் டி.கிருஷ்ணன் பெற்றுக்கொண்டார்.

இதனையடுத்து கொடி பயணம், ஜோதி பயணம் செந்தொண்டர்களின் அணிவகுப்புடன் வடலூர் கும்பகோணம் சாலையில் உள்ள மங்கையர்க்கரசி மண்டபத்தை அடைந்தது. ஊர்வலமாக எடுத்து வரப்பட்ட மக்கள் ஒற்றுமை ஜோதியினை அரசியல் தலைமைக்குழு உறுப்பினர் ஜி .ராமகிருஷ்ணன் பெற்றுக்கொண்டார். கொடியினை மாநில செயற்குழு உறுப்பினர் என்.குணசேகரன் பெற்றுக் கொண்டார். மாநாட்டு கொடியினை மூத்த தோழர் வி.முத்துவேல் ஏற்றிவைத்தார்.

மாநாட்டின் முகப்பில் அமைக்கப்பட்டிருந்த நினைவு தூபிக்கு தலைவர்கள் அஞ்சலி செலுத்தினர். பின்னர் மாநாட்டு அரங்கில் நடைபெற்ற நிகழ்ச்சியில் அஞ்சலி தீர்மானத்தை மாவட்ட செயற்குழு உறுப்பினர் எஸ்.ஜி.ரமேஷ்பாபு முன்மொழிந்தார். மாநாட்டின் வரவேற்புக் குழு தலைவர் ஏ.நமச்சிவாயம் வரவேற்புரையாற்றினார். மாநாட்டை துவக்கி வைத்து அரசியல் தலைமைக்குழு உறுப்பினர் ஜி.ராமகிருஷ்ணன் சிறப்புரையாற்றினார். மாவட்ட செயலாளர் டி.ஆறுமுகம் அரசியல் ஸ்தாபன அறிக்கைகளையும் மாநில குழு உறுப்பினர் மூசா நிதிநிலை அறிக்கையை சமர்ப்பித்து பேசினார்கள்.

மாநாட்டு அரங்கில் இந்து மதமும் இந்துத்துவாவும் ஒன்றல்ல என்கின்ற புத்தகத்தை மாநில குழு உறுப்பினர் மூசா வெளியிட மாணவர் சங்கத்தின் சௌமியா பெற்றுக்கொண்டார். தத்துவம் என்றால் என்ன என்ற புத்தகத்தினை செயற்குழு உறுப்பினர் எம்.மருதவாணன் வெளியிட வாலிபர் சங்கத்தில் செந்தமிழ்ச்செல்வன் பெற்றுக்கொண்டார். பொது மாநாட்டில் கடலூர் மாவட்டத்தில் இயற்கை சீற்றங்களால் ஏற்படும் பாதிப்புகள் குறித்த தீர்மானத்தை மாநில குழு உறுப்பினர் ஜி.மாதவன் முன்மொழிந்து பேசினார். மாநாட்டு அரங்கில் அமைக்கப்பட்டுள்ள வரலாற்றுக் கண்காட்சியை மாவட்ட செயலாளர் டி.ஆறுமுகம் திறந்துவைத்தார். மாநாட்டில் மாவட்டம் முழுவதும் இருந்துத்து 350க்கும் மேற்பட்ட பிரதிநிதிகள் கலந்துகொண்டனர்.

பதிவு: December 30, 2021
மார்க்சிஸ்ட், கடலூர், Marxist, Cuddalore
`சென்னையில் கொரோனாவால் பாதிக்கப்பட்ட தெரு, நோய் கட்டுப்பாட்டு பகுதியாக அறிவிப்பு!'- அமைச்சர் மா.சுப்பிரமணியன்

சென்னை அசோக் நகரில் எல்.ஜி.ஜி.எஸ்.காலனி 19வது தெருவில் உள்ள 2 வீடுகளில் 10 பேர் கொரோனாவால் பாதிக்கப்பட்ட தெரு, நோய் கட்டுப்பாட்டு பகுதியாக அறிவிக்கப்பட்டுள்ளதாக அமைச்சர் மா.சுப்பிரமணியன் தெரிவித்தார்.

சென்னையில் கொரோனா பாதிப்பு நாளுக்கு நாள் அதிகரித்து வருகிறது. சென்னை அசோக் நகர் எல்.ஜி.ஜி.எஸ் காலனியில் 19வது தெருவில் உள்ள 2 வீடுகளில் வசிக்கும் 10 பேருக்கு கொரோனா பாதிப்பு ஏற்பட்டுள்ளது. இந்த நிலையில், அசோக்நகரில் தனிமைப்படுத்தப்பட்ட பகுதியில் மக்கள் நல்வாழ்வுத்துறை அமைச்சர் மா.சுப்பிரமணியன், சுகாதாரத்துறை செயலாளர் ராதாகிருஷ்ணன், சென்னை மாநகராட்சி ஆணையர் ககன் தீப் சிங் பேடி ஆகியோர் ஆய்வு மேற்கொண்டனர்.

இதன் பின்னர் செய்தியாளர்களிடம் பேசிய அமைச்சர் மா.சுப்பிரமணியன், "சென்னையில் 3 இடங்களில் கொரோனா கேர் சென்டர்கள் அமைக்கப்பட்டு 500 கொரோனா படுக்கைகள் தயார் நிலையில் உள்ளன. சென்னை வர்த்தக மையத்தில் 800 ஆக்சிஜன் வசதியுடன் கூடிய படுக்கைகள் தயார்ப்படுத்தப்பட்டு வருகின்றன. தமிழகத்தில் 15 முதல் 18 வயதுள்ள மாணவர்கள் 33,20,000 பேருக்கு தடுப்பூசி போட வேண்டி இருக்கிறது. வரும் 3ம் தேதி போரூரில் உள்ள அரசு மகளிர் மேல்நிலைப்பள்ளியில் முதல்வர் மு.க.ஸ்டாலின் தடுப்பூசி போடும் பணியை தொடங்கி வைக்கிறார். தொடர்ந்து தமிழகம் முழுவதும் உள்ள பல்வேறு பள்ளிகளில் இந்த பணி தொடர்ந்து நடைபெற உள்ளது. பள்ளி நாட்களில் மாணவர்களுக்கு தடுப்பூசி போடும் திட்டம் குறித்து நடவடிக்கை எடுக்கப்பட்டு வருகிறது. ஜனவரி 10ம் தேதி முதல் 60 வயது மேற்பட்டவர்களுக்கு பூஸ்டர் டோஸ் போடும் பணி சென்னையில் தொடங்கப்படும்.

தமிழகத்தில் மொத்தம் 45 பேருக்கு ஒமிக்ரான் தொற்று ஒன்றிய அரசின் பரிசோதனையில் உறுதிப்படுத்தப்பட்டது. இந்த 45 பேரில் 16 பேர் தற்போது சிகிச்சை பெற்று வருகின்றனர். இதுவரை 129 பேருக்கு ஒமிக்ரானுக்கான அறிகுறி கண்டுபிடிக்கப்பட்டுள்ளது. இந்த 129 பேரின் மாதிரிகளும் ஒன்றிய அரசின் பரிசோதனைக்கு அனுப்பப்பட்டுள்ளது. இதுவரை தமிழகத்தில் ஒமிக்ரானால் பாதிக்கப்பட்ட அனைவருமே முதல்நிலை தொற்றிலேயே உள்ளனர். யாருக்கும் ஆக்சிஜன் வசதி தேவைப்படவில்லை.

சென்னையில் உள்ள 39,537 தெருக்களில் 507 தெருக்களில் கொரோனா நோய் தொற்று கண்டறியப்பட்டுள்ளது. 429 தெருக்களில் 3 பேருக்கும் குறைவாகவே தொற்று எண்ணிக்கை உள்ளது. எனவே தெருக்களில் கட்டுப்பாடுகள் விதிக்கப்படவில்லை. பாதிக்கப்பட்டவர்கள் வீட்டு தனிமையிலும், மருத்துவமனையிலும் உள்ளனர். கடந்த சில நாட்களில் 78 தெருக்களில் 42க்கும் மேற்பட்ட தெருக்களில் கொரோனா தொற்றுகளின் எண்ணிக்கை 4க்கும் அதிகமாக உள்ளது" என்று கூறினார்.

பதிவு: December 29, 2021
சென்னை, கொரோனா, அசோக்நகர், அமைச்சர் மா.சுப்பிரமணியன், Chennai, Corona, Ashoknagar, Minister MaSubramanian
சுற்றுலாப் பயணிகளின் கவனத்துக்கு!- குற்றால அருவிகளில் குளிக்க 3 நாட்கள் தடை

குற்றால அருவிகளில் டிசம்பர் 31 முதல் ஜனவரி 2ம் தேதி வரை பொதுமக்கள் குளிக்க தடை விதிக்கப்படுவதாக தென்காசி மாவட்ட கலெக்டர் கோபால சுந்தரராஜ் அறிவித்துள்ளார்.

கொரோனா தொற்று வழிகாட்டுதல்களை கடைபிடிக்க வேண்டி இந்நடவடிக்கை மேற்கொள்ளப்பட்டுள்ளது. தென்காசி மாவட்டம், குற்றாலத்தில் ஆண்டுதோறும் ஜூன், ஜூலை மற்றும் ஆகஸ்ட் மாதங்களில் அருவிகளில் தண்ணீர் வரத்து அதிகரிக்கும். அந்த காலகட்டத்தில் குற்றாலத்தில் சீசன் ரம்யமாக காணப்படும்.

அதுமட்டுமின்றி மெயின் அருவி, ஐந்தருவி, பழைய குற்றால அருவி, புலியருவி, சிற்றருவி உள்ளிட்ட அனைத்து அருவிகளிலும் வெள்ளியை உருக்கியது போல் தண்ணீர் ஆர்ப்பரித்து கொட்டும். இதனால் அருவிகளில் நீராட சுற்றுலாப் பயணிகளின் கூட்டம் அதிகரித்து காணப்படும். இந்நிலையில் கொரோனா ஊரடங்கு காரணமாக 8 மாதங்களுக்கு பிறகு கடந்த 20ம் தேதி குற்றால அருவிகளில் சுற்றுலாப் பயணிகள் நீராட தென்காசி மாவட்ட நிர்வாகம் அனுமதி வழங்கியது.

இதனிடையே கொரோனா நோய் வழிகாட்டுதல்களை கடைபிடிக்க வேண்டி குற்றாலம் மெயின் அருவி உள்ளிட்ட அருவிகளில் வரும் 31ம் தேதி முதல் ஜனவரி 2ம் தேதி வரை மூன்று நாட்களுக்கு அருவிகளில் நீராட பொதுமக்கள் மற்றும் சுற்றுலாப் பயணிகளுக்கு தடை விதித்து மாவட்ட ஆட்சியர் கோபால சுந்தரராஜ் உத்தரவு பிறப்பித்துள்ளார். எனவே, சுற்றுலா பயணிகள், பொதுமக்கள் வழிகாட்டு நெறிமுறைகளை கடைபிடித்து மாவட்ட நிர்வாகத்திற்கு போதிய ஒத்துழைப்பு அளிக்க வேண்டும் என்றும் அவர் கேட்டுக்கொண்டிருக்கிறார்.

பதிவு: December 28, 2021
குற்றலாம், அருவிகள், சுற்றுலாப் பயணிகள், கொரோனா, Courtallam, Waterfalls, Tourists, Corona
சென்னையில் இடிந்து விழுந்த குடிசை மாற்று வாரிய குடியிருப்பு கட்ட‌டம்!- உயிர் தப்பிய 24 வீடுகளில் இருந்த மக்கள்

சென்னை திருவொற்றியூரில் குடிசை மாற்று வாரிய குடியிருப்பு கட்ட‌டம் இடிந்து விழுந்த விபத்தில் 24 வீடுகள் தரைமட்டமாகி உள்ளது. விரிசல் ஏற்பட்டதால் அதிகாலையிலேயே மக்கள் வீட்டை விட்டு வெளியேறியதால் பெரும் உயிரிழப்பு தவிர்க்கப்பட்டது.

சென்னை திருவொற்றியூரில் உள்ள அரிவாக்குப்பத்தில் 23 ஆண்டுகள் பழமை வாய்ந்த குடிசை மாற்று வாரிய குடியிருப்பு கட்ட‌டம் செயல்பட்டு வந்தது. இந்த டி பிளாக் குடியிருப்பு கட்டடத்தில் நேற்று இலேசான விரிசல் ஏற்பட்டுள்ளது. இன்று அதிகாலையில் தரைதளத்தில் உள்ள வீட்டில் பெரிய விரிசல் ஏற்பட்டது. இதையடுத்து, அந்த குடியிருப்பில் இருந்த மக்கள் அவசரம் அவசரமாக வெளியேற்றப்பட்டனர். இந்த நிலையில், இன்று காலை குடியிருப்பு இடிந்து விழுந்து விபத்து ஏற்பட்டுள்ளது. இந்த விபத்தினால் 24 வீடுகள் தரைமட்டமாகி உள்ளதாக தகவல்கள் தெரிவிக்கின்றன.

வீடுகள் இடிந்துவிட்டதால் மக்கள் அருகில் உள்ள சமூக நலக் கூடங்களில் தங்க வைக்கப்பட்டுள்ளனர். அவர்களுக்கு உணவுகள் வழங்க ஏற்பாடு செய்யப்பட்டு வருகிறது.

தற்போது கட்டட இடிபாடுகளில் யாரேனும் சிக்கி உள்ளனரா என்பது குறித்து தீயணைப்பு படை வீரர்கள் தேடி வருகிறார்கள். மேலும் இடிபாடுகளை அகற்றும் பணியிலும் தீயணைப்புத்துறை வீர‌ர்கள் தீவிரமாக ஈடுபட்டுள்ளனர்.

பதிவு: December 27, 2021
சென்னை, திருவொற்றியூர், குடிசை மாற்று வாரியம், தமிழக அரசு, Chennai, Tiruvottiyur, Housing Board, TamilNadu Government
சென்னையில் நவீன தொழில்நுட்பத்துடன் சாலைகள் செப்பனிடும் பணி தீவிரம்!

மழையால் பாதிக்கப்பட்ட சென்னை மாநகராட்சியில் உள்ள சாலைகள் முழுவதும் நவீன தொழில்நுட்பத்துடன் செப்பனிடும் பணி விரைந்து முடிக்க அதிகாரிகளுக்கு அமைச்சர் ஏ.வ.வேலு உத்தரவிட்டார்.


சென்னையில் கடந்த சில நாட்களுக்கு முன்பு பெய்த கன மழையால் சாலைகள் பெரும்பாலும் பாதிக்கப்பட்டன. இந்தநிலையில், பொதுப்பணிகள், நெடுஞ்சாலை துறை அமைச்சர் எ.வ.வேலு பல்வேறு இடங்களுக்கு நேரில் சென்று ஆய்வு செய்தார். அப்போது, முதல் கட்ட நடவடிக்கையாக சென்னையில் உள்ள மழை வெள்ள நீரை வெளியேற்றுவதற்கு தேவையான நடவடிக்கைள் உடனுக்குடன் எடுக்கப்பட்டு மழை வெள்ள நீர் அகற்றப்பட்டது.

அதை தொடர்ந்து சென்னை நெடுஞ்சாலைத் துறைக்கு உட்பட்ட 258 கி.மீ சாலைகளை ஆய்வு செய்து அதில் 58 கி.மீ சாலைகள் சிதிலமடைந்ததை பார்வையிட்ட அமைச்சர் நெடுஞ்சாலைத் துறை தலைமைப் பொறியாளர் மற்றும் கோட்டப் பொறியாளர்களுடன் கலந்தாலோசித்து சில நவீன தொழில்நுட்ப கருவிகளை பயன்படுத்தி இச்சாலைகளை சரி செய்ய முடிவு எடுக்கப்பட்டது.

அதன் தொடர்ச்சியாக, இன்று அமைச்சர் தரமணி முதல் பெருங்குடி சாலை வரை நடைபெறும் பணிகளை நேரில் சென்று ஆய்வு செய்து அச்செய்முறைகளை பார்வையிட்டார். பிறகு இப்பணிகளை விரைவுப்படுத்த அதே தொழில்நுட்பத்தை கொண்டு பாதிக்கப்பட்ட மற்ற சாலைப் பணிகளையும் விரைந்து முடிக்க உத்தரவிட்டார்.

மேலும், சென்னை மாநகரம் முழுவதும் பல்வேறு இடங்களை ஆய்வு செய்து பணிகள் விரைவுப்படுத்தப்பட்டது. சாலைகள் செப்பனிடும் பணிகள் கோயம்பேடு, கொளத்தூர், அண்ணா சாலை, தாம்பரம், சோழிங்கநல்லூர் மற்றும் சேலையூர் பகுதிகளில் போர்க்கால அடிப்படையில் நடைபெற்று வருகின்றன. இன்னும் சில நாட்களில் சாலைகள் அனைத்தும் செப்பனிடப்பட்டு போக்குவரத்துக்கு இடையூறு இல்லாமல் பொதுமக்கள் பயன்பாட்டிற்கு கொண்டு வரப்படும் என பொதுப்பணித்துறை அமைச்சர் தெரிவித்துள்ளார்.

 

பதிவு: December 04, 2021
சென்னை, சாலைகள், அமைச்சர் எ.வ.வேலு, Chennai, Roads, Minister EVVelu
தற்போதைய செய்திகள்
இந்திய செய்திகள்